ბრაზილიამ ჯგუფში პირველი ადგილი გაინაღდა

ბრაზილიის ნაკრები ისევ შეუჩერებელია. ტიტეს გუნდს კოპა ამერიკის ჯგუფის მოსაგებად მხოლოდ 3 თამაში დაჭირდა.

"სელესაო" მე-3 შეხვედრაში კოლუმბიას დაუპირისპირდა და 3 ქულა აიღო, თუმცა წინა 2 შემთხვევისგან განსხვავებით გაჭირვებით. ბრაზილიელები მე-10 წუთიდან მოყოლებული აგებდნენ. მათ 78-ე წუთზე ფირმინოს გოლით გაათანაბრეს, მსაჯის მიერ დამატებულ მე-10 წუთზე კი გამარჯვების გოლი კაზემირომ გაიტანა.

არბიტრს ამდენი დროის დამატება იმის გამო მოუხდა, რომ ბრაზილიელთა პირველ გოლს დიდი ხნის განმავლობაში განიხილავდნენ. საქმე ისაა, რომ შეტევის დროს ბურთი მსაჯს მოხვდა და მიმართულება მნიშვნელოვნად შეიცვალა. ამ დროს თამაში აუცილებლად ჩერდება, მაგრამ ამ შემთხვევაში ასე არ მოხდა და გოლი ჩაითვალა.

"ბარსელონას" ბრაზილიელი მარჯვენა მცველი ემერსონი მთელი შეხვედრის განმავლობაში სათადარიგო იყო.

ბრაზილიამ ჯგუფი მოიგო, ეს კი იმას ნიშნავს, რომ თუ არგენტინაც იმავეს გააკეთებს, ეს გუნდები ერთმანეთს ფინალამდე ვერ შეხვდებიან.