აგენტებს მორიბას ლაიფციგში გადასვლა სურთ | Sport

დღეს გავრცელებული ცნობების თანახმად, ილაიშ მორიბას "ტოტენჰემში" ტრანსფერი პრაქტიკულად გადაწყვეტილი იყო, თუმცა, Sport-ის ინფორმაციით, ფეხბურთელის მომავალი კვლავ გაურკვეველია.

წყაროს თანახმად, "ბარსელონამ" 18 წლის მოთამაშეს აცნობა, რომ მის ლონდონურ კლუბში გაშვებაზე თანახმაა, ვინაიდან "დეზების" შემოთავაზება აკმაყოფილებს, რაც 15 მილიონ ევროსა და ბონუსებს მოიცავს.

"ტოტენჰემში" გადასვლა მორიბასაც სურს, თუმცა მის წარმომადგენლებს "ლაიფციგში" ტრანსფერი ურჩევნიათ, რადგან კლუბთან წინასწარ შეთანხმებას რამდენიმე კვირის წინ უკვე მიაღწიეს. გერმანული გუნდი მათ უკეთეს ფინანსურ პირობებს სთავაზობთ.

"ლაიფციგმა" "ბარსას" რამდენიმე დღის წინ 8 მილიონი შესთავაზა, რაზეც უარი მიიღო. კატალონიურ კლუბს იმ თანხის მიღება სურს, რის გადახდასაც "ტოტენჰემი" აპირებს.

ამ ყველაფრიდან გამომდინარე, მოვლენების განვითარების სამი გზა არსებობს: "ლაიფციგთან" შეთანხმების მიუხედავად, მორიბა ლონდონურ კლუბს უერთდება; "ლაიფციგი" "ბარსელონას" მოთხოვნას აკმაყოფილებს და ფეხბურთელი გერმანულ გუნდში გადადის ან მორიბა "ბარსაში" რჩება და მთელ სეზონს ტრიბუნებზე ატარებს.

საკუთარი მომავალი ახლა 18 წლის ნახევარმცველის ხელშია.