მირალემ პიანიჩი იმედოვნებს, რომ ჩავის ნდობას მოიპოვებს

"ბარსელონადან" "ბეშიქთაშში" იჯარით გაშვებული ნახევარმცველი, მირალემ პიანიჩი იმედოვნებს, რომ კატალონიურ კლუბში დაბრუნების შემდეგ ჩავი ერნანდესის ნდობას მოიპოვებს, იტყობინება Mundo Deportivo.

რონალდ კუმანი ბოსნიელ ფეხბურთელს სათამაშო დროს პრაქტიკულად არ აძლევდა, რითაც პიანიჩი ძალიან უკმაყოფილო იყო. ზაფხულის სატრანსფერო ფანჯრის უკანასკნელ დღეებში, "ბარსამ" ის ერთი წლით "ბეშიქთაშში" გაანათხოვრა. თურქულ კლუბს გამოსყიდვის ვალდებულება არ აქვს. ბოსნიელის ზამთარში დაბრუნება არ განიხილება - 31 წლის შუახაზელი სეზონის ბოლომდე "შავი არწივების" შემადგენლობაში დარჩება, შემდეგ კი "ბლაუგრანაში" დაბრუნდება. პიანიჩს კატალონიელებთან კონტრაქტი 2024 წლამდე აკავშირებს.

გამოცდილ ნახევარმცველს სეზონის კარგად დაწყებაში ხელი მიღებულმა ტრავმებმა შეუშალა - ბოსნიელმა "ბეშიქთაშის" რიგებში მხოლოდ 8 მატჩი ჩაატარა და 4 საგოლე გადაცემის გაკეთება მოახერხა.