ფილიპე კოუტინიო ბარსადან წასვლაზე ფიქრობს
"ბარსელონას" ნახევარმცველი ფილიპე კოუტინიო ნელ-ნელა თანხმდება იმ ფაქტს, რომ, თუ მას მსოფლიო ჩემპიონატზე მონაწილეობა უნდა, კატალონიური კლუბი უნდა დატოვოს. ამ ინფორმაციას Mundo Deportivo ავრცელებს.
კოუტინიო "ბარსას" ისტორიაში ყველაზე ძვირადღირებული შენაძენია, მაგრამ, რამდენიმე შანსის მიუხედავად, ის კატალონიურ გუნდში სათანადოდ ვერ ათამაშდა. უკვე ყველა ხვდება, რომ 29 წლის ფეხბურთელი, რომელიც ამავდროულად კლუბის ყველაზე მაღალანაზღაურებადი ფეხბურთელია, "ბლაუგრანას" ტვირთად აწვება.
MD-ს ცნობით, კოუტინიო დღითი დღე უფრო და უფრო ეგუება იმ ფაქტს, რომ მას "ბარსელონადან" წასვლა მოუწევს. ფილიპეს მსოფლიო ჩემპიონატზე თამაში სურს, რის გამოც ის "ბლაუგრანას" დატოვებასა და სათამაშო დროის მოძიებას აპირებს. ამავე დროს "ბარსას" მისი გაშვება და სახელფასო ფონდის გამოთავისუფლება უნდა.
წყაროს ინფორმაციით, კოუტინიოს აგენტი მისი კლიენტის ტრანსფერზე უკვე მუშაობს. ბრაზილიელის წარმომადგენელი ცდილობს, მოთამაშემ კვლავ ინგლისს მიაშუროს, სადაც მან კარიერის საუკეთესო წლები გაატარა.
ცნობილი სპორტული ჟურნალისტი ფაბრიციო რომანო იტყობინება, რომ კოუტინიოთი რამდენიმე კლუბი ინტერესდება, ერთ-ერთი მათგანი კი ინგლისური "ევერტონია".
ამ სიახლეზე კომენტარები გათიშულია.
კომენტარები [ 3 ]