ბარსელონა რამდენიმე მეკარეს აკვირდება
Mundo Deportivo-ს ინფორმაციით, "ბარსელონა" რამდენიმე მეკარით ინტერესდება - იმ შემთხვევაში, თუ კარის ახალი დარაჯის შეძენა აუცილებელი გახდება, კლუბი ერთ-ერთ მათგანს მოიყვანს.
წყაროს ცნობით, "ლურჯ-ბროწეულისფერები" იასინ ბონოს ("სევილია), ილან მელიეს ("ლიდსი"), ბარტლომეი დრონგოვსკის ("ფიორენტინა"), მარტენ ვანდევორტსა და ალბან ლაფონს ("ნანტი") აკვირდებიან.
როგორც კატალონიური გამოცემა იტყობინება, "ბარსაში" მარკ-ანდრე ტერ შტეგენის მომავალი ეჭვქვეშ არაა, მიუხედავად იმისა, რომ ის საუკეთესო სეზონს არ ატარებს. კლუბისა და ჩავი ერნანდესისთვის გერმანელი ხელშეუხებელია.
რაც შეეხება გუნდის მეორე მეკარეს - ნეტუს "ბლაუგრანაში" დარჩენა ნაკლებად სავარაუდოა, მისი ხელფასის მოშორება კი კლუბსაც სურს, რადგან ფიქრობს, რომ, სათადარიგო მეკარის კვალობაზე, მას ძალიან მაღალი ანაზღაურება აქვს, თუმცა, ბრაზილიელის წასვლას სწორედ ეს ფაქტორი ართულებს - მურარა ხელფასის შემცირებას არ აპირებს.
ასევე, შესაძლებელია, რომ "ბარსელონამ" ნეტუს შემცვლელად, ახალი მეკარის შეძენის ნაცვლად, ინიაკი პენია გამოიყენოს, რომელიც კლუბმა სეზონის ბოლომდე "გალათასარაიში" გაანათხოვრა. "ბარსას" ფიქრობს, რომ, შესაძლოა, ტერ შტეგენის დუბლიორად სწორედ პენია დაიტოვოს.
ამ სიახლეზე კომენტარები გათიშულია.
კომენტარები [ 7 ]