ჩემპიონთა ლიგის 1/2 ფინალში ქალების გუნდის მეტოქე ცნობილია

ქალების ჩემპიონთა ლიგის 1/2 ფინალში "ბარსელონას" მეტოქე ცნობილია. რამდენიმე წუთის წინ დასრულებულ შეხვედრაში "ვოლფსბურგმა" "არსენალი" საკუთარ კედლებში 2-0 დაამარცხა, ორი მატჩის ჯამში 3-1 მოიგო და ნახევარფინალში გავიდა.

პირველი ნახევარფინალური შეხვედრა 23 ან 24 აპრილს ბარსელონაში გაიმართება, განმეორებითი კი 30 აპრილს ან პირველ მაისს ვოლფსბურგში.

"ბარსელონას" სურს, რომ ნახევარფინალური მატჩიც "კამპ ნოუზე" გაიმართოს, მაგრამ პრობლემას ის ქმნის, რომ 24 აპრილს "ბარსელონას" კაცების გუნდს "რაიოსთან" აქვს საშინაო შეხვედრა. ეს საკითხი ჯერ გადაწყვეტილი არაა.

რაც შეეხება მეტოქეს: "ვოლფსბურგი" ქალების ჩემპიონთა ლიგის ისტორიაში ერთ-ერთი საუკეთესო გუნდია. ამ გუნდს ფინალში 5-ჯერ აქვს ნათამაშები, ტურნირი კი ორჯერ მოუგია.

ბოლო გუნდი, რომელმაც "ბარსელონა" ჩემპიონთა ლიგიდან გამოაგდო, სწორედ "ვოლფსბურგია". ეს 2019 წლის ნოემბერში მოხდა, როდესაც კორონავირუსის გამო ნახევარფინალები ერთ მატჩად ჩატარდა. გერმანელებმა ესპანელებს 1-0 სძლიეს. პირველად მაშინ გამოჩნდა, რომ "ბლაუგრანას" ქალებში უკვე ანგარიშგასაწევი გუნდი ჰყავდა, მას შემდეგ კი კიდევ უფრო გაძლიერდა.

ნახევარფინალში ასევე გასულია ტურნირის კიდევ ერთი ფავორიტი, "პარი სენ-ჟერმენი", რომლის მეტოქეც დღეს, "ლიონისა" და "იუვენტუსის" დაპირისპირებაში გაირკვევა. წინასწარი პროგნოზებით ყველაზე ლოგიკური ფინალი "ბარსელონა"-"პარი სენ-ჟერმენი" უნდა იყოს.