შესაძლოა, Turkish Airlines ბარსელონას სპონსორი გახდეს

Spotify-სთან შეთანხმების შემდეგ, "ბარსელონა" მორიგ სპონსორებს ეძებს.

ჟოან ლაპორტას განცხადებით, "ბარსას" მაისურის სახელოს სპონსორობის სურვილს რამდენიმე კომპანია გამოთქვამს. Mundo Deportivo-ს ინფორმაციით, ერთ-ერთი მათგანი Turkish Airlines-ია.

წყაროს თანახმად, თურქულ ავიაკომპანიას "ბლაუგრანასთან" თანამშრომლობა სურს. მხარეები მოლაპარაკებებს აწარმოებენ. შეთანხმების შემთხვევაში, Turkish Airlines-ის სახელწოდება "ბარსას" მაისურების სახელოზე განთავსდება. კატალონიელებს 10-15 მილიონი ევროს მიღება სურთ.

"ბარსელონა" და Turkis Airlines 2010-12 წლებშიც თანამშრომლობდნენ.

მაისურის სახელოს ბოლო სპონსორი თურქული კომპანია Beko იყო, რომელთან ურთიერთობა კატალონიურმა კლუბმა გასულ სეზონში გაწყვიტა. "ბარსა" მიმდინარე სეზონში სახელოზე წარწერის გარეშე ასპარეზობს.