ბერნარდუ სილვა ოცნების ახდენის მოლოდინში

როგორც ცნობილია, მიმდინარე ზაფხულში "ბარსელონას" ერთ-ერთი სატრანსფერო სამიზნე ბერნარდუ სილვაა.

Mundo Deportivo-ს ინფორმაციით, პორტუგალიელმა "ბარსას" საკუთარი თავი იანვარშიც შესთავაზა, მაგრამ კლუბმა მაშინ ფერან ტორესი შეიძინა. ამ ტრანსფერისთვის ინგლისში ვიზიტის დროს, სილვა კატალონიელთა ერთ-ერთ წარმომადგენელს შეხვდა და შეატყობინა, რომ "ბლაუგრანაში" გადმოვლას ისურვებდა.

ვინაიდან ეს კონტაქტი მოკლე იყო, "ლურჯ-ბროწეულისფერთა" ხელმძღვანელობამ იფიქრა, რომ საქმე ხუმრობასთან ჰქონდათ, თუმცა, რამდენიმე დღის შემდეგ, კლუბის ერთ-ერთმა წევრმა ბერნარდუსგან მესიჯი მიიღო, რომელშიც ფეხბურთელი კატალონიურ გრანდში გადმობარგების სურვილს კიდევ ერთხელ გამოთქვამდა. 

ზამთრის სატრანსფერო ფანჯრის შემდეგ 27 წლის შემტევი ნახევარმცველის აგენტ ჟორჟე მენდეშსა და ჟოან ლაპორტას, მატეუ ალემანისა და რაფა იუსტეს შორის არაერთი შეხვედრა გაიმართა, რომელშიც აგენტმა კლუბს თავისი კლიენტის ინტერესები კიდევ უფრო კარგად გააცნო.

პორტუგალიელს "ბარსელონაში" თამაში ძალიან სურს და ამაზე ბავშვობიდან ოცნებობს - ამჟამად, ის ამ ოცნების ახდენას ელოდება. თუმცა, სილვას ტრანსფერი ფრენკი დე იონგსა (ნიდერლანდელის თაობაზე "ბლაუგრანა" და "მანჩესტერ იუნაიტედი" შეთანხმებას უახლოვდებიან) და ეკონომიკური ბერკეტების გააქტიურებაზეა დამოკიდებული. 

ბერნარდუ 10 წლის ასაკიდან "ბარსას" გულშემატკივარია. მან კატალონიური კლუბის ქომაგობა 2004 წელს, "ბარსელონაში" დეკუს გადმოსვლის შემდეგ დაიწყო. სილვამ თავის მშობლებს ლურჯ-ბროწეულისფერი მაისურის შეძენა სთხოვა და ჩავის, ბუსკეტსის, ინიესტასა და მესის ყურებაში გაიზარდა.