ბარსელონა და კოლიადო კონტრაქტის გახანგრძლივებაზე შეთანხმდნენ

"ბარსელონას" ახალგაზრდა შემტევი ალექს კოლიადო კატალონიურ კლუბთან კონტრაქტს ერთი წლით გაახანგრძლივებს. Sport-ის ცნობით მხარეებმა შეთანხმებას ყველა დეტალზე მიაღწიეს.

კოლიადო "ლა მასიას" ბოლო წლების ერთ-ერთ მთავარ ვარსკვლავად ითვლება. გასული სეზონის პირველ სეზონში მან ბიუროკრატიული სირთულეების გამო ვერ ითამაშა, მეორე ნახევარში კი "გრანადაში" იჯარით იმყოფებოდა და საკმარისი სათამაშო დროც მიიღო.

იყო მოლოდინი, რომ რაფინიას დამატებისა და უსმან დემბელესთან კონტრაქტის გახანგრძლივების შემთხვევაში კოლიადო გუნდს დატოვებდა, მაგრამ როგორც გაირკვა, ჩავი მას არა გარემარბად, არამედ ნახევარდაცვაში ხედავს, რის გამოც ალექსი "ბლაუგრანაში" რჩება.

Sport-ის ცნობით 23 წლის ფეხბურთელის კონკურენტები პედრი, გავი, პაბლო ტორე, სერჟი რობერტო, კესიე და დარჩენის შემთხვევაში ფრენკი დე იონგი იქნებიან, თუმცა მოსალოდნელია, რომ კოლიადო სათამაშო დროს მაინც მიიღებს.

აქამდე კოლიადოს "ბარსელონასთან" კონტრაქტი 2023 წლამდე აკავშირებდა, ახალი შეთანხმება კი, რომელიც ჯერ ხელმოწერილი არაა, მის მომავალს კატალონიურ კლუბს 2024 წლის ზაფხულამდე დააკავშირებს.