რობერტ ლევანდოვსკი ბარსელონას კვირას მაიამიში შეუერთდება

რობერტ ლევანდოვსკის "ბარსელონაში" ტრანსფერი რომ გადაწყვეტილია, ეს არაერთხელ დაიწერა. პოლონელ ვარსკვლავს კატალონიურ კლუბთან ოფიციალურად რამდენიმე საათი აშორებს.

ცნობილია, რომ "ბარსას" ლევანდოვსკის ტრანსფერი 50 მილიონი ევრო დაუჯდება, სადაც ბონუსებიცაა გათვალისწინებული. The Athletic-ის ცნობით "ბლაუგრანა" "ბაიერნს" 45 მილიონ ევროს გარანტირებულად გადაუხდის, დანარჩენი 5 მილიონი კი ბონუსები იქნება.

იმავე წყაროს ცნობით ლევანდოვსკი ახალ გუნდს კატალონიაში არ შეუერთდება. "ბლაუგრანა" დღეს ამერიკაში მიფრინავს. პოლონელი იმავე გზას ხვალ გაუდგება და სამედიცინო შემოწმებას მაიამიში გაივლის, რის შემდეგაც ახალ თანაგუნდელებთან ერთად ვარჯიშს დაიწყებს.

მოსალოდნელია, რომ რობერტს "ბარსას" ფორმით პირველად 20 ივლისის დილას, ჩვენი დროით 04:00 საათზე, "ინტერ მაიამის" წინააღმდეგ ვიხილავთ.