ბარსელონას სურს, ლევანდოვსკის 9 ნომერი რაც შეიძლება მალე მიანიჭოს

"ბარსელონას" სურს, გუნდის ვარსკვლავურ შენაძენს, რობერტ ლევანდოვსკის 9 ნომერი რაც შეიძლება მალე მიანიჭოს და პოლონელი მაისურების ამ ნომრით გაყიდვა დაიწყოს. თუმცა პრობლემა ისაა, რომ ეს ნომერი "ბარსაში" უკვე დაკავებულია.

Sport-ის ცნობით ლევანდოვსკი შესანიშნავ ფიზიკურ ფორმაშია და მას მოედანზე გასვლა გუშინ "ინტერ მაიამის" წინააღმდეგაც შეეძლო, თუმცა კლუბმა გადაწყვიტა, ეს 24 ივლისს "რეალის" წინააღმდეგ მოხდეს.

"ბარსელონას" სურს, ლევანდოვსკის 9 ნომერი რაც შეიძლება მალე მიანიჭოს, რაც კლუბს პოლონელის მაისურების გაყიდვაში დაეხმარება. კატალონიური გამოცემის ცნობით "ბლაუგრანაში" ფიქრობენ, რომ რობერტის მაისურების გაყიდვით დაახლოებით 20 მილიონ ევროს გამოიმუშავებენ. "ბარსელონას" მიზანია, იდეალურ შემთხვევაში ლევანდოვსკის 9 ნომერი ამხანაგურ "ელ კლასიკომდე" მიანიჭოს.

პრობლემა ისაა, რომ 9 ნომერი ამჟამად მემფის დეპაის აქვს, რომლის პრიორიტეტიც "ბარსელონაში" დარჩენაა. კატალონიელებს მოუწევთ, ნიდერლანდელი ან გაყიდონ, ან ის ნომრის დათმობაზე დაითანხმონ და "ელ კლასიკომდე" ეს ძალიან გაჭირდება.