ბარსელონელები ჟერარ პიკეს ემშვიდობებიან

"ბარსელონას" ფეხბურთელები ჟერარ პიკეს ემშვიდობებიან.

ჟორდი ალბა: "ჟერარი დიდი კარიდან გაცილებას იმსახურებს. ის ჩვენთვის ფუნდამენტალური ფეხბურთელი იყო და ერთად ბევრი ტიტული მოვიგეთ. ჩვენ "ლა მასიელები" ვართ და კლუბის მიმართ განსაკუთრებული გრძნობები გაგვაჩნია. ჯერის წასვლა სამწუხარო სიახლეა."

სერხიო ბუსკეტსი: "პიკე საუკეთესო ცენტრალური მცველია, რომელიც "ბარსას" ოდესმე ჰყოლია. მან კლუბის ისტორია შეცვალა. ერთად ბევრი ტიტული დავისაკუთრეთ და დიდებული დრო გავატარეთ. "ბარსელონას" ნაწილი მიდის, რაც ბევრს ნიშნავს."

სერჟი რობერტო: "ყველამ ვიცით, პიკე რამდენად დიდი კულეა. ის ფანებისთვის, კლუბისა და გასახდელი ოთახისთვის ძალიან მნიშვნელოვანი და მთავარი ფიგურა იყო როგორც მოედანზე, ისე მის გარეთ. ეს ძალიან დიდი დანაკარგია."

რობერტ ლევანდოვსკი: "ჟერარ პიკე არა მხოლოდ კლუბის ლეგენდა, არამედ, სიმბოლური მოთამაშეა. მის წინააღმდეგ თამაში და ბრძოლა მახსოვს, ახლა კი, როგორც თანაგუნდელი, ჯერი ბრწყინვალეა. მან ყველაფერი მოიგო."

ფრენკი დე იონგი: "ჟერარი კლუბისთვის ძალიან მნიშვნელოვანი ფეხბურთელია. ის აკადემიაში გაიზარდა და ყველაფერი მოიგო. როცა "ბარსას" ხედავ, მას პიკესთან აკავშირებ."

მარკოს ალონსო: "ჟერარს მშვიდად წასვლა შეუძლია. გასახდელ ოთახს ერთად ვიზიარებდით, ის სამაგალითო ადამიანია. მას ისეთი კარიერა ჰქონდა, როგორსაც ნებისმიერი ფებურთელი ინატრებდა. ჩვენთვის მისი წასვლა დიდი დარტყმაა."

რაფინია: "პიკე მსოფლიოს ერთ-ერთი საუკეთესო მცველია. მან კლუბისთვის ბევრი გააკეთა. ჟერარი გასახდელ ოთახში ყველასთვის სამაგალითო პიროვნებაა."

არნაუ ტენასი: "ყველამ ვიცით, ჟერარი ვინ არის და როგორია. გასახდელ ოთახში ის მნიშვნელოვანი ფიგურაა, ბევრს გვმატებს და ყველასთან ახლოსაა. წლების განმავლობაში მისი თანაგუნდელობა უდიდესი სიამოვნება იყო."