5 მიზეზი, რატომაც ბარსელონა უპირატესობას ვიტორ როკეს ანიჭებს

უკვე დიდი ხანია, ვრცელდება ინფორმაცია, რომ "ბარსელონა" ვიტორ როკეთი ინტერესდება, რომელიც ბრაზილიაში ერთ-ერთი ყველაზე შთამბეჭდავი ტალანტია და ბრაზილიის სერია ა-ში უკვე რეგულარულად თამაშობს.

კატალონიურმა გამოცემამ Sport-მა 5 მთავარი მიზეზი გამოყო, რატომაც "ბარსა" სხვებთან შედარებით უპირატესობას სწორედ როკეს ანიჭებს.

გამოცდილება ახალგაზრდულ ასაკში

როკეს პროფესიონალურ დონეზე თამაშის გამოცდილება უკვე აქვს. მის ანგარიშზე 52 მატჩია. გარდა ამისა, 20-წლამდელთა კოპა ამერიკაზე ბრაზილის ნაკრების 9 გოლიდან 5 სწორედ ვიტორზე მოდის. ბევრი ვარაუდობს, რომ 2026 წელს ის "სელესაოსთან" ერთად მსოფლიო ჩემპიონატზე წავა - ამ დროს ბრაზილიელი მხოლოდ 21 წლის იქნება.

თავდამსხმელის ინსტინქტი

რა თქმა უნდა, შემტევისთვის მთავარია, რომ გოლების გატანის უნარი მაღალ დონეზე ჰქონდეს განვითარებული. როკეს მეტოქეთა კარის აღება ნამდვილად არ უჭირს და კლასიკური 9-იანის თვისებებსაც ავლენს.

უნივერსალიზმი

მიუხედავად იმისა, რომ მისი ფავორიტი პოზიცია ცენტრია, ბრაზილიელს ფლანგზე გადასვლაც შეუძლია. როკე უნივერსალია და მოედნის მესამეში მოქმედება ნებისმიერ ადგილას შეუძლია.

ხასიათი

ასაკის მიუხედავად, როკეს ძლიერი მენტალიტეტი გამოარჩევს. ის ბრძოლაში შესვლასა და დრიბლინგს არ ერიდება.

პერსპექტივა 

ვიტორს ნამდვილად აქვს შესაძლებლობა, რომ მსოფლიო კლასის ფეხბურთელი გახდეს. კატალონიური კლუბის იდეა ისაა, რომ მან რობერტ ლევანდოვსკისგან ისწავლოს, საბოლოოდ კი პოლონელი ჩაანაცვლოს. "ბარსაში" სჯერათ, რომ როკეს მის დონემდე ასვლა შეუძლია.