ბარსელონას დაცვა რეკორდის ზღვარზე

მიმდინარე სეზონში "ბარსელონას" დაცვას ლა ლიგის ლიდერობაში დიდი წვლილი მიუძღვის - გუნდს 21 ტურის შემდეგ მხოლოდ 7 გოლი აქვს გაშვებული და რეკორდის ზღვარზე იმყოფება.

სეზონის სტარტზე მარკ-ანდრე ტერ შტეგენს არაერთი სეივის განხორციელება უწევდა, რათა გუნდი გოლისგან ეხსნა, მაგრამ კუნდე-არაუხო-კრისტენსენი-ბალდეს ოთხეულის ჩამოყალიბების შემდეგ, "ბარსას" უკანახაზი სოლიდურად გამოიყურება.

"ბარსელონა" მატჩში საშუალოდ მხოლოდ 0.33 გოლს უშვებს, რაც ლა კორუნიის "დეპორტივოს" მიერ 1993/94 წლების სეზონში დაფიქსირებული შედეგის იდენტურია. მაშინ "დეპორტმა" 22-ე ტურში 0-2 წააგო, რაც ნიშნავს, რომ "კადისთან" 2 გოლზე ნაკლების გაშვების შემთხვევაში "ბარსა" რეკორდსმენი გახდება.

საქმე ისაა, რომ ესპანეთის ჩემპიონატის ისტორიაში, 22 მატჩის შემდეგ 8 გოლზე ცოტა არავის გაუშვია. შესაბამისად, ამ შედეგის დაფიქსირების შემთხვევაში, ტერ შტეგენი, კუნდე, არაუხო, კრისტენსენი და ბალდე ლა ლიგის ისტორიაში შევლენ.

ზოგადად, სეზონში ყველაზე ცოტა გაშვებული გოლის რეკორდი სწორედ "დეპორტივოსა" (1993-94) და მადრიდის "ატლეტიკოს" (2015/16) ეკუთვნით - ორივე მათგანმა სეზონი მხოლოდ 18 გაშვებული გოლით (საშუალოდ 0.47 გოლი მატჩში) დაასრულა.