ბარსელონა დემბელეს ალ ჰილალში გაყიდვას ცდილობს
უსმან დემბელეს მომავალთან დაკავშირებით განახლებული ცნობები ვრცელდება.
დღეს გავრცელდა ინფორმაცია, რომლის თანახმადაც "ბარსელონა" დროს წელავს იმისათვის, რომ პსჟ-სა და დემბელეზე ზეწოლა მოახდინოს. Footmercato-ს ჟურნალისტის, სანტი აუნას ცნობით კი კატალონიელთა მხრიდან დროის გაწელვას სხვა მიზანიც აქვს.
აუნას ინფორმაციით "ბლაუგრანას" სურს, რომ დემბელე "ალ ჰილალში" გადასვლაზე დაითანხმოს. არაბული კლუბი ფეხბურთელს წელიწადში 100 მილიონ ევროს, ხოლო საკომისიოს სახით 50 მილიონს სთავაზობს, თუმცა უსმანი უარზეა და მას პსჟ-ში გადასვლა სურს.
იმავე წყაროს ცნობით "ბარსელონას" არც კი უპასუხია პსჟ-ს შეტყობინებისთვის, რომელიც დემბელეს სამედიცინო შემოწმების ხვალ, ორშაბათს ჩატარებას გულისხმობს.
ახალ ცნობებს ავრცელებს RMC Sport-ის ჟურნალისტი ფაბრის ოუკინსიც. ეს სწორედ ის ჟურნალისტია, რომელმაც დემბელეს პსჟ-ში გადასვლაზე ინფორმაცია პირველმა გაავრცელა. მისი ცნობით "ბარსელონასა" და პსჟ-ს შორის შეთანხმება კი არსებობს, მაგრამ კატალონიური კლუბი შეთანხმებული 50 მილიონიდან 25 მილიონზე მეტის მიღებას ითხოვს და ეს აჭიანურებს ტრანსფერს. კატალონიელებს პარიზელებისთვის ტრანსფერისთვის საჭირო დოკუმენტაცია ჯერ არ გაუგზავნიათ, თუმცა პსჟ ტრანსფერის განხორციელებაში მაინც დარწმუნებულია.
ოუკინსის ცნობით "ბლაუგრანამ" დემბელეს დღევანდელ ვარჯიშზე უხმო.
როგორც ირკვევა, რეალობა ასეთია - "ბარსელონა" და "პარი სენ-ჟერმენი" სატრანსფერო თანხაზე, 50 მილიონ ევროზე შეთანხმდნენ, მაგრამ ჯერ კიდევ შესათანხმებელია, რამდენი შეხვდება ამ თანხიდან "ბარსას" და რამდენი დემბელეს.
ამ სიახლეზე კომენტარები გათიშულია.
კომენტარები [ 6 ]