ესპანეთის სუპერთასი: იცოდით თუ არა, რომ?

"ბარსელონა" ხვალ, საუდის არაბეთის დედაქალაქ რიადში, ესპანეთის სუპერთასის ნახევარფინალურ ეტაპზე "ოსასუნას" დაუპირისპირდება.

დღეს კი აღნიშნულ ეტაპზე ერთმანეთს მადრიდული გრანდები, "რეალი" და "ატლეტიკო" დაუპირისპირდებიან და გაირკვევა, თუ ვის შეხვდება "ბლაუგრანა" პოტენციურ ფინალში, რომელიც 14 იანვარს გაიმართება.

ალ ნასრის მოედანზე

სამივე თამაში ალ-ავალის სტადიონზე (ასევე ცნობილი, როგორც KSU სტადიონი) გაიმართება, რომელიც 25,000 მაყურებელს იტევს. ეს "ალ ნასრის" საშინაო არენაა, სადაც პორტუგალიელი სუპერვარსკვლავი, კრიშტიანუ რონალდუ თამაშობს. ერთი კვირის შემდეგ აქ იტალიის სუპერთასიც ჩატარდება, რომელიც მსგავს ფორმატს პირველად გამოიყენებს (ნახევარფინალი, ფინალი).

ნაცნობი ადგილი

"ბარსა" ორი წლის წინ, ამ მოედანზე, მარადონას თასზე, "ბოკა ხუნიორსს" დაუპირისპირდა. ეს ამხანაგური ღონისძიება იყო, რომელიც ლეგენდარული არგენტინელის ხსოვნის საპატივსაცემოდ გაიმართა. მატჩი 1-1 დასრულდა და პენალტების სერიაში კატალონიელებმა იმარჯვეს.

მამაკაცები და ქალები, გამარჯვებულები

"ბარსელონამ" გასულ წელს, ესპანეთის სუპერთასის ფინალში მადრიდის "რეალი", 3-1 დაამარცხა. ერთი კვირის შემდეგ, "ბლაუგრანას" ქალების გუნდმაც მოიგო აღნიშნული ტურნირი. მათ ფინალში "რეალ სოსიედადი", 3-0 დაამარცხეს. ამით "ბარსა" გახდა პირველი გუნდი, რომელმაც ერთ სეზონში, მამაკაცების და ქალების ერთი ტურნირი მოიგო.

მარკ-ანდრე ტერ შტეგენი, ყველაზე მეტი შეხვედრა

გერმანელმა მეკარემ ამ ტურნირზე, 2014/15 წლების სეზონში მოსვლის შემდეგ, 13 შესაძლო მატჩიდან 9 ჩაატარა. ის ახლა შეხვედრას ტრავმის გამო გამოტოვებს, როგორც 2016/17 და 2019/20 წლების სეზონში. თუ "ბარსა" ფინალში გასვლას შეძლებს და სერჟი რობერტო ორივე თამაშს ითამაშებს, მაშინ ის ამ რეკორდს გაუთანაბრდება.

მესის, გვარდიოლასა და კრუიფის რეკორდები

ამ ტურნირზე ყველაზე მეტი გოლი ლეო მესიმ გაიტანა, 14 გოლი 20 თამაშში, მათ შორის გოლები ზედიზედ 4 (2009, 2010, 2011, 2012) ფინალში. ამავდროულად, იოჰან კრუიფმა და პეპ გვარდიოლამ, როგორც მწვრთნელებმა, ეს ჯილდო სამჯერ მოიგეს. მოქმედ მწვრთნელს, ჩავის, ერთი უკვე მოგებული აქვს და შეეცდება "ბარსელონას" ეს ტიტული მე-15-ჯერ მოაგებინოს.

აღსანიშნავია, რომ ჩავიმ "ბარსელონაში" სადებიუტო გოლი სწორედ ესპანეთის სუპერთასზე, 1999 წელს, "მალიორკას" წინააღმდეგ გაიტანა.