გრანადას მწვრთნელი: მათ სუსტი წერტილები აქვთ, რაც ჩვენს უპირატესობად უნდა ვაქციოთ

"გრანადას" 45 წლის სპეციალისტმა, ალექსანდერ მედინამ "ბარსელონასთან" მატჩამდე პრესკონფერენცია გამართა.

როგორც ურუგვაელმა მწვრთნელმა თქვა, მის გუნდს წინ რთული თამაში ელის, თუმცა გამარჯვების მოპოვება შეუძლებელი არ იქნება.

"ბარსელონასთან" 3 ქულის ასაღებად საუკეთესო მატჩი უნდა ჩავატაროთ და ყველა კომპონენტში იდეალურად ვიასპარეზოთ.

"ბარსელონა" ლიგის ერთ-ერთი საუკეთესო გუნდია, მრავალმხრივი და შეტევაში ახალგაზრდული პოტენციალით. ჩვენ დიდი ყურადღებით უნდა ვითამაშოთ, მეტოქე წნეხში ვამყოფოთ და ბურთთან ერთად დიდი დრო გავატაროთ. წინ ნამდვილად რთული თამაში გველის, თუმცა გამარჯვება შეუძლებელ მისიად არ მესახება.

ჩავის გუნდს თავისი სუსტი წერტილები გააჩნია, რომელთა ჩვენს სასიკეთოდ გარდასახვასაც ვეცდებით.

- თქვა ალექსანდერ მედინამ.

აქვე გეტყვით იმასაც, რომ "ბარსელონა" "გრანადას" ლა ლიგაში უკვე 4 თამაშია ვერ უგებს, ამის ფონზე კი მედინას იმედიანი დამოკიდებულება გასაკვირი სულაც არაა.