პარი სენ-ჟერმენი 2-3 ბარსელონა | ბარსას საოცარი ქამბექი პარიზში
"ბარსელონამ" "პარი სენ-ჟერმენთან" ჩემპიონთა ლიგის პირველი მეოთხედფინალური მატჩში პარიზში გასვლაზე 3-2 მოიგო.
მატჩი პარიზელთა უპირატესობით დაიწყო, მაგრამ "ბარსამ" ნელ-ნელა მეტოქეს ზეწოლა შეამცირებინა და პირველი გოლიც თავად გაიტანა: 37-ე წუთზე რაფინია ბელოლიმ ანგარიში გახსნა და პირველი ტაიმი ჩავის გუნდის გამარჯვებით დასრულდა.
მეორე ნახევარი პსჟ-მა ისევ აქტიურად დაიწყო, "ბლაუგრანა" დაბნეული ჩანდა, რითაც მასპინძლებმა ისარგებლეს და სამწუთიან მონაკვეთში მეტოქეს 2 გოლი გაუტანეს: 48-ე წუთზე უსმან დემბელემ შეაგდო, 51-ზე კი - ვიტინიამ.
მიუხედავად იმისა, რომ "ბარსელონა" ურთულეს მდგომარეობაში აღმოჩნდა, სიტუაციის შემოატრიალება მაინც შეძლო. შოკიდან გამოსვლის შემდეგ, 62-ე წუთზე, მოედანზე წამებით ადრე გამოსული პედრის პასით, რაფინიამ დუბლი შეასრულა და წონასწორობა აღადგინა, 77-ე წუთზე კი, მინდორზე 2 წუთით ადრე შესულმა ანდრეას კრისტენსენმა, ილქაი გიუნდოგანის ჩაწოდების შემდეგ, ჯანლუიჯი დონარუმას კარი თავური დარტყმით აიღო და გუნდს უმნიშვნელოვანესი გამარჯვება მოუტანა.
მატჩის საუკეთესო ფეხბურთელი, რა თქმა უნდა, რაფინია გახდა, თუმცა აქვე უნდა აღვნიშნოთ ჟიულ კუნდეს შესანიშნავი პერფორმანსი, რომელმაც კილიან მბაპეს, ფაქტობრივად, ფეხი არ გაანძრევინა და მსოფლიო ფეხბურთის ერთ-ერთი მთავარი ვარსკვლავი გადაკეტა.
განმეორებითი მატჩი 16 აპრილს ბარსელონაში ჩატარდება, მანამდე კი "ბარსა" ლა ლიგაში "კადისს" (13 აპრილს) შეხვდება.
ამ სიახლეზე კომენტარები გათიშულია.
კომენტარები [ 31 ]