დორტმუნდი 2-3 ბარსელონა | ბარსამ გერმანიაში იმარჯვა!

ჩემპიონთა ლიგის მე-6 ტურში, სიგნალ იდუნა პარკზე, ბარსელონა დორტმუნდს დაუპირისპირდა და დრამატულ ბრძოლაში 3-2 დაამარცხა.

ბარსა ორჯერ იგებდა, ბორუსიამ ორივეჯერ გაათანაბრა, მაგრამ შეცვლაზე შემოსულმა ფერან ტორესმა გერმანელებს დუბლი შეუსრულა და ჰანსი ფლიკის გუნდს მოაგებინა.

"ბლაუგრანა" 53-ე წუთზე რაფინიას გოლით დაწინაურდა. 6 წუთში სერუ გირასიმ პენალტით წონასწორობა აღადგინა. ამის შემდეგ, ფერან ტორესმა ბარსელონა კვლავ წინ გაიყვანა, მაგრამ გირასიმ ანგარიში ისევ გაათანაბრა. საბოლოოდ, 85-ე წუთზე, ბრწყინვალე კონტრშეტევისა და ლამინ იამალის შესანიშნავი თამაშის შემდეგ, ტორესმა მეორე გოლიც გაიტანა და ბარსამ 3-2 მოიგო. აღსანიშნავია, რომ დორტმუნდმა საკუთარ მოედანზე ჩემპიონთა ლიგის მატჩი ბოლო 3 წლის განმავლობაში პირველად წააგო.

6 ტურის შემდეგ, ბარსელონა სატურნირო ცხრილში 15 ქულით მე-2 ადგილს იკავებს. პირველადგილოსან ლივერპულს 18 ქულა აქვს.

"ლურჯ-ბროწეულისფერებს" ჩემპიონთა ლიგაზე მომდევნო მატჩის გამართვა 2025 წლის 21 იანვარს, ბენფიკას წინააღმდეგ უწევთ. ამ მატჩამდე, ბარსა მომდევნო ორ შეხვედრას ლა ლიგაში - ლეგანესთან და ატლეტიკოსთან გამართავს; შემდეგ გუნდი კოპა დელ რეიზე ბარბასტროს შეხვდება; ამის მერე კატალონიელები ჯედაში (საუდის არაბეთი), ესპანეთის სუპერ თასის ნახევარფინალში ბილბაოს დაუპირისპირდებიან; ბოლოს კი პრიმერა დივიზიონში ხეტაფეს ეთამაშება.