მატიემ თანაგუნდელებს შეატყობინა, რომ "ბარსელონადან" მიდის

"ბარსელონას" მცველმა, ჟერემი მატიემ, ესპანეთის თასის მოგების შემდეგ რამდენიმე თანაკლუბელს შეატყობინა, რომ ზაფხულში გუნდიდან წასვლას აპირებს, იტყობინება Mundo Deportivo.

33 წლის ფრანგს, რომლის კონტრაქტიც "ლურჯ-ბროწეულისფერებთან" კიდევ ერთი წლით მოქმედებს, ორი კლუბისგან შეთავაზება აქვს.

ვრცელდება ინფორმაცია, რომ კოპა დელ რეის ფინალის შემდეგ, მადრიდიდან ბარსელონაში გადაფრენის დროს მატიემ გუნდის პარტნიორებს სთხოვა, რომ სუვენირულ ბურთზე ხელი მოეწერათ, რაც შეიძლება მისი წასვლის გადაწყვეტილებას მოწმობდეს.

"ბარსელონაში", მატიეს თამაშით საბოლოოდ იმედგაცრუებულები ჩემპიონთა ლიგის 1/4 ფინალის პირველი მატჩის შემდეგ დარჩნენ, სადაც "იუვენტუსმა" საკუთარ მოედანზე კატალონიური გრანდი 3:0 დაამარცხა. პირველი ტაიმის შემდეგ "ლურჯ-ბროწეულისფერები" ორ ბურთიანი სხვაობით აგებდნენ და შესვენების დროს ლუის ენრიკემ ფრანგი ფეხბურთელი შეცვალა. ამის შემდეგ მატიე მოედანზე არ გასულა.