"ჩელსი" ვილიანს €80 მილიონზე ნაკლებად არ უშვებს, "ბარსელონამ" შემცვლელი იპოვა

გუშინ ღამით გავრცელებული ინფორმაციის თანახმად, ლონდონის "ჩელსიმ" უარი "ბარსელონას" კიდევ ერთ შეთავაზებაზე თქვა. კატალონიელები "ლურჯებს" 61 მილიონ ევროს უხდიდნენ, მაგრამ "ჩელსი" ვილიანის გაშვებაზე თანახმა იქამდე არ იქნება, სანამ შეთავაზებული თანხა 80 მილიონამდე არ გაიზრდება, ეს კი, როცა სხვა ტრანსფერებიც საჭიროა, 29 წლის ფეხბურთელისთვის ძნელი გასამეტებელია, განსაკუთრებით "ბარსას" ხელმძღვანელობის მიერ. ასე რომ, ფაქტიურად გადაწყდა - ვილიანი "ჩელსის" არ დატოვებს. 

ამის შემდეგ, სპორტული პრესა ახალმა ინფორმაციამ მოიცვა. რაკი "ბარსას" ვილიანის ტრანსფერში ხელი მოეცარა, კატალონიელებმა შემცვლელის ძიება დაიწყეს და ბევრად უფრო პერსპექტიულ, ახალგაზრდა მალკომს მიადგნენ. "ბორდოს" ვინგერის "რომაში" გადასვლა უკვე გადაწყვეტილი იყო, მაგრამ ბრაზილიელი ფეხბურთელი ბოლო საათებში იტალიაში არ ჩასულა და ამან გააჩინა ეჭვი, რომ "ბარსელონამ" ორ კლუბს შორის შემდგარი შეთანხმება თავის სასარგებლოდ ჩაშალა.