რა ხდება, როდესაც პირველი გოლი მესის გააქვს?

ესპანეთის ჩემპიონატის პირველ ტურში, "ბარსელონასა" და "ალავესს" შორის გამართული მატჩის პირველი გოლი ლეო მესიმ გაიტანა. შესაბამისად, არგენტინელს ეკუთვნის ლა ლიგაში "ბარსელონას" პირველი გოლი. ეს კი წარმატებული სეზონის მომასწავებელია.

სტატისტიკოსები გვამცნობენ, რომ თუ პრიმერაში "ბარსას" პირველი გოლი მესის გააქვს, სეზონი კატალონიური გუნდისთვის წარმატებით მთავრდება.

ლეოს ეს აქამდე 4-ჯერ აქვს გაკეთებული. 2008/09 წლების სეზონში, "ბარსელონამ" ტრებლი მოიგო. 2010/11 წლების სეზონში, კატალონიელებმა გამარჯვება ესპანეთის ჩემპიონატსა და ჩემპიონთა ლიგაზე იზეიმეს. 2011/12 წლების სეზონში, "ბარსამ" ესპანეთის თასი, მსოფლიოს საკლუბო ჩემპიონატი, ესპანეთის სუპერ თასი და ევროპის სუპერ თასი მოიგო. 2014/15 წლების სეზონში კი, კატალონიურმა კლუბმა ტრებლი ისტორიაში მეორედ შეასრულა.

რა თქმა უნდა, ეს მხოლოდ ცრურწმენაა. სიმართლე კი ისაა, რომ "ბარსელონას" ლეო მესი ჰყავს, რაც წარმატებისთვის უკვე საკმარისია.