ხავიერ ტებასი: არ მგონია, პიკე ქსენოფობი იყოს, მაგრამ ის შეიძლება დაისაჯოს
ლა ლიგის პრეზიდენტი ხავიერ ტებასი "ესპანიოლთან" მატჩში ჟერარ პიკეს გოლის აღნიშვნის საკითხს ეხმაურება და არ გამორიცხავს, რომ "ბარსელონას" ცენტრალური მცველი დაისაჯოს.
პიკემ, "ესპანიოლთან" მატჩში გოლის გატანის შემდეგ, თითი ტუჩებთან მიიტანა, რაც შეფასდა, როგორც მეტოქე გუნდის გულშემატკივრებისთვის გაჩუმებისკენ მოწოდება. "ესპანიოლმა", რა თქმა უნდა, შანსი ხელიდან არ გაუშვა და პიკეს წინააღმდეგ ლა ლიგაში მორიგი საჩივარი შეიტანა.
"კომიტეტი დაადგენს, ჩაიდინა თუ არა პიკემ დასჯადი ქმედება. არსებული რეგულაციების თანახმად, შესაძლებელია, გოლის გარკვეული აღნიშვნები პროვოკაციად შეფასდეს.
უნდა აღინიშნოს, რომ "ესპანიოლმა" კარგად იმუშავა და პიკეს გოლამდე, გულშემატკივრები მის ოჯახს შეურაცხყოფას არ აყენებდნენ. გულშემატკივრებმა შეურაცხყოფით მის პროვოკაციულ ჟესტს უპასუხეს." - ციტირებს ტებასის სიტყვებს Sport.
ტებასი ასევე გამოეხმაურა პიკეს ფრაზას, როდესაც მან "ესპანიოლი" მოიხსენია როგორც "ესპანიოლი" კორნელიადან". თავად "ესპანიოლმა" ეს კომენტარი გქსენოფობიის გამოვლინებად შეაფასა. "პირადად მე არ მგონია, რომ პიკე ქსენოფობი იყოს, მაგრამ მისი ქმედება მოსაწონი არ იყო." - ტებასის ამ სიტყვებს უკვე AS ციტირებს.
ამ სიახლეზე კომენტარები გათიშულია.
კომენტარები [ 7 ]