პიკეს 4-მატჩიანი დისკვალიფიკაცია მისცეს

"ბარსელონას" ცენტრალურ მცველს, ხერარდ პიკეს, "ბილბაოსთან" ესპანეთის სუპერ თასზე მიღებული წითელი ბარათის გამო, 4-მატჩიანი დისკვალიფიკაცია მისცეს. ამ ინფორმაციას კატალონიური კლუბის ოფიციალური საიტი ავრცელებს.

პიკემ წითელი ბარათი "ბილბაოსთან" გამართული შეხვედრის 56-ე წუთზე, გვერდითი არბიტრისთვის შეურაცხყოფის მიყენების გამო მიიღო. მოგვიანებით, 28 წლის ფეხბურთელმა ბოდიში მოიხადა.

ესპანური პრესის ცნობით, პიკეს 4-დან 12 მატჩამდე დისკვალიფიკაცია ემუქრებოდა. როგორც გაირკვა, სადისციპლინო კომიტეტმა კატალონიელ ფეხბურთელს მინიმალური სასჯელი დაუწესა.

პიკე "ბილბაოსთან" და "ატლეტიკოსთან" სტუმრად, ხოლო "მალაგასთან" და "ლევანტესთან" შინ გასამართ დაპირისპირებებს გამოტოვებს.