გორგოძის ლელო და მსოფლიო რეკორდი "კამპ ნოუზე"

24 ივნისს, "ბარსელონას" საშინაო არენაზე, "კამპ ნოუზე", საფრანგეთის რაგბის ჩემპიონატის, ტოპ 14-ის ფინალური მატჩი გაიმართა, რომელშიც ქართველის მორაგბის, მამუკა გორგოძის "ტულონი" "რასინგს" დაუპირისპირდა.

ფინალური მატჩის გასამართად "კამპ ნოუ" იმიტომ შეირჩა, რომ საფრანგეთში ევროპის ჩემპიონატი მიმდინარეობს და "სტად დე ფრანსი", რომელიც ფინალს ტრადიციულად მასპინძლობს, დაკავებულია.

თამაში "რასინგის" გამარჯვებით, ანგარიშით 29:21 დასრულდა. შეხვედრაში დადებული 2 ლელოდან ერთი "ტულონის" ქართველის მოთამაშის, მამუკა გორგოძის ანგარიშზეა.

აღსანიშნავია, რომ "კამპ ნოუზე" გამართულ მატჩში მსოფლიო რეკორდი დამყარდა. აქამდე არასდროს დაფიქსირებულა შემთხვევა, რომ რაგბში, საკლუბო დონეზე, თამაშს 99 124 ადამიანი დასწრებოდეს. წინა რეკორდი 84 068 მაყურებელი იყო და ის 2015 წელს, "უემბლიზე" დაფიქსირდა.