რას ითხოვს კლუბი ალეიშ ვიდალისგან

ორშაბათს, "ბლაუგრანას" მარჯვენა მცველ ალეიშ ვიდალსა და კლუბის წარმომადგენელ ხოსე როდრიგეს ბასტერს შორის სატელეფონო საუბარი გაიმართა ფეხბურთელის გარშემო არსებული სიტუაციის განსახილველად. საუბრის ძირითადი აზრი ის იყო, რომ ფეხბურთელს შანსი სჭირდება, საშუალება, რომ გამოავლინოს თავისი მონაცემები, შესაძლებლობები, რომელთა გასაუმჯობესებლადაც ყოველთვის თავდაუზოგავად ვარჯიშობს.

ფეხბურთელს "ბარსელონაში" ყველა მხარში უდგას, ამხნევებენ, რომ ივარჯიშოს, გაუმჯობესდეს და კლუბის შემადგენელ ნაწილად იქცეს - პატარა ჭანჭიკად საათის მექანიზმივით მოქმედ "ბარსელონაში". თუმცა ბოლო კვირებში გავრცელდა ინფორმაცია, რომ ალეიშ ვიდალმა კლუბიდან წასვლის გადაწყვეტილება მიიღო, სხვადასხვა ცნობებით, მან თანაგუნდელებსაც შეატყობინა ამის შესახებ. თავის მხრივ, ყველას ესმის, რომ გუნდს საკუთარი განვითარების ტემპიც გააჩნია, რომელსაც ყველა უნდა აყვეს, რათა შედეგს საფრთხე არ დაემუქროს. მიუხედავად ამისა, არავის უნდა ვიდალის პოტენციალის უარყოფა, ამიტომაც გახშირდა მასთან საუბრები, ფეხბურთელის საბოლოო გადაწყვეტილებამდე.

აქამდე რამდენჯერმე გავრცელდა ინფორმაცია, რომ ფეხბურთელსა და მწვრთნელს შორისაც იყო გარკვეული კონფლიქტი. თუმცა, ფეხბურთელის გადაწყვეტილებასთან ამას არანაირი კავშირი და ზეგავლენა არ ექნება. ყველა სატელეფონო საუბარში განხილული იქნა ალეიშ ვიდალის პოტენციალი, მისი ადგილი კლუბში, სათამაშო სტილი, მისი უპირატესობანი, ის, რის გამოც არის დღეს "ბლაუგრანაში" და არა ის, თუ ვისთან როგორი ურთიერთობა აქვს. კლუბში ფიქრობენ, რომ ეს ახლა ყველაზე ნაკლებად მნიშვნელოვანია. მიუხედავად ყველაფრისა, ოფიციალურად, ფეხბურთელს წასვლა არასდროს მოუთხოვია, ზაფხულზე იყო შანსი, თუმცა ეს არც მაშინ მოხდა. ზამთრის სატრანსფერო ფანჯარამდე ჯერ კიდევ ორთვენახევარია დარჩენილი და სიტუაცია შეიძლება შეიცვალოს.