ლუის ენრიკეს ერთი გადაწყვეტილება დარჩა მისაღები

"ბარსელონას" მთავარ მწვრთნელს, ლუის ენრიკეს, "მანჩესტერ სიტისთან" ოთხშაბათს გასამართი მატჩისთვის, მხოლოდ ერთი გადაწყვეტილება აქვს მისაღები. Sport-ის ცნობით, ასტურიელმა სპეციალისტმა უკვე იცის 10 ფეხბურთელი, რომლებიც სასტარტო შემადგენლობაში ითამაშებენ.

შეტევის ხაზს, რა თქმა უნდა, ლეო მესი, ლუის სუარესი და ნეიმარი დააკომპლექტებენ. ნახევარდაცვაშიც გასული სეზონის უცვლელი სამეული ითამაშებს სერხიო ბუსკეტსის, ივან რაკიტიჩისა და ანდრეს ინიესტას სახით.

დაცვის ფლანგებზე ახლახანს გამოჯანმრთელებულ ხორდი ალბასა და სერჟი რობერტოს ვიხილავთ.

კარში აუცილებლად მარკ-ანდრე ტერ შტეგენი იდგება.

რა თქმა უნდა, სასტარტო შემადგენლობაში იქნება ხერარდ პიკე. ერთადერთი კითხვა კი ისაა, თუ ვინ ითამაშებს კატალონიელის გვერდით. ლუის ენრიკეს 2 ალტერნატივა აქვს - ხავიერ მასკერანო, ან სამუელ უმტიტი. კატალონიელი ჟურნალისტები უპირატესობას არგენტინელს ანიჭებენ. მართალია, მასკერანო უმტიტისთან შედარებით გადაღლილია, მაგრამ ახალგაზრდა ფრანგ მცველს დიდი ხანია არ უთამაშია და მას პრაქტიკა აკლია. თუმცა, უშანსოდ არც ისაა.