რა შეიცვალა "ბარსელონას" გასახდელში ვალვერდეს მოსვლის შემდეგ?

გასული 3 წლისგან განსხვავებით, მიმდინარე სეზონში, "ბარსელონას" პირველი გუნდის გასახდელში განსხვავებული სიტუაციაა, რაც ახალი მთავარი მწვრთნელის, ერნესტო ვალვერდეს დამსახურებაა.

ვალვერდე, ლუის ენრიკესთან შედარებით, უფრო გაწონასწორებული, პრაგმატული და ნაკლებად ემოციური პიროვნებაა.

Sport-ის ინფორმაციით, მიმდინარე სეზონში, "ბარსელონას" ფეხბურთელები რთული სიტუაციების გადალახვას შედარებით მარტივად ახერხებენ.

მას შემდეგ, რაც ვალვერდეს კლუბის ხელმძღვანელობამ განუცხადა, რომ ისინი ვერც ფილიპე კოუტინიოს შეძენას ახერხებდნენ და ვერც ანხელ დი მარიასი, 53 წლის სპეციალისტმა სიტუაციისთვის შეუსაბამო სიმშვიდე გამოიჩინა.

ასე მოხდა ესპანეთის სუპერ თასზე "რეალთან" უშანსოდ წაგების შემდეგაც. მაშინ, კლუბის ერთ-ერთმა დირექტორმა, პეპ სეგურამ მარცხში ჟერარ პიკე დაადანაშაულა და გუნდის ერთ-ერთი ვიცე-კაპიტნის, სერხიო ბუსკეტსის კრიტიკა დაიმსახურა. ვალვერდე კი სიმშვიდეს ინარჩუნებდა.

ამჟამად, "ბარსელონას", დაცვის ხაზში სერიოზული პრობლემები აქვს: ხავიერ მასკერანო გუნდს 1 თვით გამოაკლდა, ჟერარ პიკესა და სამუელ უმტიტის დისკვალიფიკაციამდე თითო ყვითელი ბარათი აშორებთ, ტომას ვერმალენი კი, მისი ტრავმიანობის გათვალისწინებით, საიმედო ფეხბურთელი ნამდვილად არაა. მდგომარეობა მართლაც მძიმეა, მაგრამ როგორც ვალვერდე, ასევე პირველი გუნდის ფეხბურთელები, მას მშვიდად შეხვდნენ, ეს კი მწვრთნელის მიდგომების დამსახურებაა.

ცნობილია, რომ ერნესტო ვალვერდე ყოველთვის პრაგმატულია, არასდროს ისახავს გრძელვადიან ან საშუალოვადიან გეგმებს და მუდამ ყოველდღიურ მუშაობაზეა კონცენტრირებული, ეს კი გუნდს ნებისმიერ სიტუაციაში თავდაჯერებულობის შენარჩუნებაში ეხმარება. ლუის ენრიკეს დროს სიტუაცია სხვაგვარი იყო: ის უფრო ინსტინტუქტი, ნაკლებად მოქნილი სპეციალისტი იყო, რომელიც ნაჩქარევ გადაწყვეტილებებს ხშირად იღებდა.