ერნესტო ვალვერდე "ესპანიოლთან" შემადგენლობის როტაციას გეგმავს

კატალონიური Sport-ის ინფორმაციით, "ბარსელონას" მთავარი მწვრთნელი ერნესტო ვალვერდე, ესპანეთის თასის ნახევარფინალში "ვალენსიასთან" გასამართი მატჩისთვის, რამდენიმე ფეხბურთელის "შემონახვას" გეგმავს და მათ "ესპანიოლთან" ხვალ დაასვენებს.

სეზონის დასკვნითი ნაწილი კარს მოგვადგა და ახლა, სწორ როტაციას ძალიან დიდი მნიშვნელობა აქვს. თუ "ბარსელონას" სურს ტრებლი ისტორიაში მესამედ მოიგოს, კატალონიელებს ძალების სწორად გადანაწილება მოუწევთ.

ხვალინდელ შეხვედრაში, "ბარსელონას" კარს კვლავ მარკ-ანდრე ტერ შტეგენი დაიცავს, როგორც ეს ლა ლიგის თამაშებში ყოველთვის ხდება ხოლმე. ივარაუდება, რომ დაისვენებს სერჟი რობერტო, ხოლო დაცვის მარჯვენა ფლანგზე ნელსონ სემედუ დადგება, რომელიც "ვალენსიასთან" მატჩის განაცხადში არ იყო.

მოედნის ცენტრში უნდა ველოდოთ ანდრე გომეშის დაბრუნებას, მაგრამ ყველაზე დიდი სიახლე, სავარაუდოდ, ფილიპე კოუტინიო იქნება. კატალონიელი ჟურნალისტები ბრაზილიელი ახალწვეულის სასტარტო შემადგენლობაში მეორედ ხილვას ელიან.

გაურკვეველია, სასტარტოში იქნება თუ არა ლუის სუარესი. ურუგვაელი შესანიშნავ ფორმაშია - ბოლო 11 თამაშში მან 13 გოლი გაიტანა, მაგრამ დასვენება მასაც სჭირდება. არაა გამორიცხული, მის ნაცვლად ძირითადში პაკო ალკასერი ვიხილოთ.