"ბარსას" სამიზნე "ლაიპციგში" გადადის

ზაგრების "დინამოს" ესპანელი ლიდერი დანი ოლმო გერმანულ "ლაიპციგში" გადასვლასთან ძალიან ახლოსაა. ამ ინფორმაციას ჯანლუკა დი მარციო და ხორვატული Sportske Novosti ავრცელებენ.

ოლმო, რომელიც "ბარსელონას" სკოლის აღზრდილია, კატალონიური გუნდის ერთ-ერთი მთავარი სამიზნე იყო და "ბლაუგრანაში" დაბრუნების სურვილს თავად 21 წლის შემტევიც გამოთქვამდა. თუმცა, ლუის სუარესის ტრავმამ "ბარსას" გეგმები შეცვალა და ახლა კლუბი იძულებულია ცენტრფორვარდის დამატებაზე იზრუნოს.

ოლმოს, აქამდე, "მილანს" უკავშირებდნენ, მაგრამ ჯანლუკა დი მარციოს ინფორმაციით, ახლა ის "ლაიპციგში" გადასვლასთანაა ძალიან ახლოს. გერმანელები მასში 28 მილიონ ევროს გადაიხდიან, ბონუსების სახით კი 11 მილიონი იქნება გათვალისწინებული.

ხორვატული Sportske Novosti-ს ინფორმაციით, ოლმომ "დინამოს" ბაზა უკვე დატოვა და ის გერმანიაში დღეს საღამოს გაემგზავრება.