122 წლის წინ - როდესაც "ბარსას" საკუთარი მსაჯი ჰყავდა

თანამედროვე ფეხბუთში, მსაჯის შერჩევას ძალიან დიდი მნიშვნელობა აქვს - ხომ არაა კონკრეტული არბიტრი თამაშის მონაწილე რომელიმე გუნდის გულშემატკივარი, ხომ არ აქვს მას რაიმე ინტერესი რომელიმე გუნდის მიმართ... მაგალითად, ჩემპიონთა ლიგის 2006 წლის ფინალის ერთ-ერთი გვერდითი არბიტრი, თამაშამდე რამდენიმე დღით ადრე, იმიტომ შეცვალეს, რომ მან "ბარსელონას" მაისურთან ერთად სურათები გადაიღო. 100 წლის წინ კი სიტუაცია რადიკალურად განსხვავებული იყო.

იმ დროს, როდესაც ფეხბურთი მისი თანამედროვე სახისგან ძალიან შორს იყო, მსაჯობა სრულად სამოყვარულო საქმიანობა გახლდათ. ამის დამამტკიცებელ ერთ-ერთ საინტერესო შემთხვევას ამ სტატიაში გაგაცნობთ.

ენრიკ პერის დე ვარგასი "ბარსელონას" იმ ლეგენდარულ ფეხბურთელებს შორის შედის, რომლის სახელიც ბევრ გულშემატკივარს გაგონილიც კი არ აქვს. არადა, დე ვარგასი პირველი ფეხბურთელია, რომელმაც "ბლაუგრანას" მაისურით 200 თამაში ჩაატარა. ის კლუბში 11 წლის განმავლობაში, 1906-1917 წლებში თამაშობდა.

დე ვარგასმა თამაში ნახევარდაცვაში დაიწყო და მარცხენა მცველად დაასრულა. "ბარსელონას" მაისურით მან სულ 308 თამაში ჩაატარა და 34 გოლი გაიტანა. კლუბთან ერთად მან 3-ჯერ ესპანეთის თასი, 5-ჯერ კატალონიის ჩემპიონატი და 4-ჯერ პირენეის თასი მოიგო.

საფეხბურთო კარიერის დასრულების შემდეგ, ენრიკ პერის დე ვარგასმა მსაჯობა გადაწყვიტა და იმ დროის ერთ-ერთ საუკეთესო არბიტრადაც ჩამოყალიბდა.

1918 წლის 3 თებერვალს, ანუ ზუსტად 102 წლის წინ, დე ვარგასს კარიერა 2 თვის დამთავრებული ჰქონდა. ის აპირებდა, საღამოს, "კალიე ინდუსტრიაზე", "ბარსელონასა" და "ესპანიოლის" თამაშს დასწრებოდა. მანამდე კი, სახლში ლანჩისთვის შეიარა. მოულოდნელად, კარზე ზარის ხმა გაისმა.

დე ვარგასს "ბარსელონას" 2 დირექტორი ეწვია და საღამოს გასამართ დერბიში მსაჯობა შესთავაზა. დე ვარგასმა მათ უარი უთხრა. უპირველესად იმიტომ, რომ ის თამაშის ოჯახთან ერთად ყურებას აპირებდა, ხოლო მეორე მიზეზად ის დასახელდა, რომ დე ვარგასი "ბარსას" ყოფილი მოთამაშე იყო და მიუკერძოებელი არბიტრი ვერ იქნებოდა.

დირექტორები დე ვარგასის უარს არ დასთანხმდნენ. საქმე ისაა, რომ წინა დღეს, "ესპანიოლსა" და "ბარსელონას" შორის გამართულ შეხვედრაში, რომელიც "ბლაუგრანამ" 2-3 წააგო, "ესპანიოლის" კლუბის წევრმა, სამპერემ იმსაჯა. ასე რომ, მეტოქეს პრეტენზიები ვერ ექნებოდა.

საბოლოოდ, ვარგასმა ხელში სასტვენი აიღო, იმავე ტაქსში ჩაჯდა, რომლითაც მასთან სტუმრები მივიდნენ და "ბარსელონას" მიერ ანგარიშით 5-2 მოგებულ შეხვედრაში იმსაჯა.