"ბარსაში" მსჯელობენ - ფატი თუ დეპაი

თუ MD-ს ვენდობით, "ბარსას" ხელმძღვანელობა სერიოზულად განიხილავს, ღირს თუ არა შემტევებში ფულის დახარჯვა, მიუხედავად რონალდ კუმანის მოთხოვნისა. როგორც ვიცით, კუმანი დეპაის შეძენით არის დაინტერესებული, "ბარსას" ხელმძღვანელობას კი მიაჩნია, რომ სათადარიგო სკამზე ანსუ ფატისა და ტრინკაუს ყოფნა საკმარისია.

მას შემდეგ, რაც ფატიმ ესპანეთის ნაკრებში სადებიუტო გოლი გაიტანა და ერთ-ერთი საუკეთესო იყო მოედანზე, მის მიმართ ნდობა გაიზარდა და ყველა ხვდება, რომ ახალგაზრდა ვარსკვლავისთვის სათამაშო დრო აუცილებელია, კონკურენტებად ანტუან გრიზმანი და უსმან დემბელე ჰყავს, გრიზმანი იმიტომ, რომ კუმანი როგორც ერთს, ისე მეორეს, ცენტრშიც განიხილავს, ანტუანს მუდმივად, ხოლო ფატის, გარკვეულ შემთხვევებში.

ამას თუ მემფის დეპაიც დაემატა, მართლაც ძალიან რთული წარმოსადგენი გახდება, სად და რამდენს ითამაშებს ფატი. Marca-ს ერთ-ერთმა ჟურნალისტმა შემოგვთავაზა განლაგება, სადაც ფლანგები ფატისა და დემბელეს აქვთ დათმობილი, ხოლო ლიონელ მესი ათიანზე დგას. ეს ფატისთვის კარგი განლაგებაა, მაგრამ თითქმის გამორიცხულია ასე მოხდეს, რადგან კლუბში კოუტინიო დაბრუნდა და რონალდ კუმანს მისი ეიმედება.

უკვე თითქმის გამორიცხულია ლაუტაროს დამატება. "ბარსას" ფინანსური კრიზისი იმაზე გაცილებით მძიმეა, ვიდრე გარედან ჩანს, ამიტომ არც ის იქნება გასაკვირი, რომ დეპაიზეც უარი თქვან. სამაგიეროდ აუცილებლად გასაძლიერებელია დაცვის ხაზი, ამიტომ ფინანსური რესურსის დიდი ნაწილი რომ დაცვაზე დაიხარჯოს, გონივრული იქნება, მაგრამ კუმანს თავის მოთხოვნები აქვს და რამდენადაც მას ვიცნობთ, განრისხებაც სჩვევია.