გიორგი წიტაიშვილი "ბარსელონასთან" თამაშს შეძლებს

კიევის "დინამოს" 19 წლის ფეხბურთელი, გიორგი წიტაიშვილი, კორონავირუსისგან განიკურნა და ხვალ, "ბარსელონასთან" თამაშს შეძლებს.

მან "კამპ ნოუზე" გამართული შეხვედრა სწორედ კოვიდ-19-ის გამო გამოტოვა. ქართული წარმოშობის ფეხბურთელი, ამჟამად, უკრაინის 21-წლამდელთა ნაკრების წევრია.

გარდა წიტაიშვილისა, ვირუსი "დინამოს" კიდევ 8 ფეხბურთელმა დაამარცხა, მათ შორის არიან გუნდის ორი მეკარე: ბუშანი და ბოიკო. შესაბამისად, დიდი ალბათობით, მოედანზე ვეღარ ვიხილავთ პირველი მატჩის აღმოჩენას, რუსლან ნეშჩერეტს.

თუმცა კიეველთა მთავარ მწვრთნელს, მირჩა ლუჩესკუს, კორონავირუსმა 4 ფეხბურთელი წაართვა: ტიმჩიკი, კოსტიჩევი, სიდორჩუკი და ციგანკოვი. მათი დაინფიცირება ახლახანს, ეროვნულ ნაკრებში ყოფნისას მოხდა. 

შეგახსენებთ, რომ ჩემპიონთა ლიგის მეოთხე ტურის მატჩი ხვალ, "კიევის ოლიმპიურ სტადიონზე", თბილისის დროით 23:55 საათზე, დაიწყება.