ნიუკასლს ლანგლეს შეძენა უნდა
"ნიუკასლმა" თვალი "ბარსელონას" ცენტრალურ მცველს, კლემან ლანგლეს დაადგა. ამ ინფორმაციას Sport ავრცელებს.
"ნიუკასლს" ახალი მფლობელი ჰყავს, რომელსაც დიდი გეგმები აქვს. ბოლო დროს ინგლისური კლუბის მიერ ფილიპე კოუტინიოთი დაინტერესებაზე აქტიურად იწერებოდა, ახლა კი "კაჭკაჭების" ყურადღება "ბარსას" კიდევ ერთმა ფეხბურთელმა, ლანგლემაც მიიპყრო.
Sport-ის ინფორმაციით, "ნიუკასლი" მემარცხენე ცენტრალურ მცველს ეძებს, ლანგლეს ვარიანტი კი კლუბს ძალიან მოსწონს. ინგლისელებს ფრანგი უკანახაზელის დამატება ზამთრის სატრანსფერო ფანჯრის პერიოდში სურთ.
ლანგლეს პოზიციები "ბარსელონაში" გასული სეზონის შემდეგ მნიშვნელოვნად შეირყა. 26 წლის ფეხბურთელს მიმდინარე სეზონში ძალიან ცოტა სათამაშო დრო აქვს. მან მხოლოდ 4 მატჩში მიიღო მონაწილეობა და მოედანზე სულ რაღაც 95 წუთი გაატარა.
ივარაუდება, რომ "ბლაუგრანა" კლემან ლანგლეს იანვარში გაყიდის.
ამ სიახლეზე კომენტარები გათიშულია.
კომენტარები [ 7 ]