ფრანსიშკუ ტრინკაუს ტრანსფერის დეტალები ოფიციალურად ცნობილია

გუშინ ოფიციალურად დადასტურდა, რომ ფრანსიშკუ ტრინკაუ ახალ სეზონში სამშობლოში, კონკრეტულად კი ლისაბონის "სპორტინგში" ითამაშებს.

"ბარსელონას" მიერ გაკეთებული განცხადებიდან ირკვევა, რომ "სპორტინგმა" 22 წლის ფეხბურთელი იჯარით აიყვანა გამოსყიდვის უფლებით, თუმცა როგორც ირკვევა, რეალურად საქმე გამოსყიდვის ვალდებულებასთან გვაქვს.

პორტუგალიურმა კლუბმა ტრანსფერის დეტალები გაასაჯაროვა. გაირკვა, რომ ლისაბონელები ერთწლიან იჯარაში 3 მილიონ ევროს გადაიხდიან, 2023 წელს კი მათ მათ ფრანსიშკუს 7 მილიონ ევროდ გამოსყიდვის უფლება ექნებათ, რომელიც ვალდებულებად გარდაისახება, თუ "სპორტინგი" პორტუგალიის ჩემპიონატის უმაღლეს ლიგაში დარჩა. ეს კლუბი პრიმეირა ლიგადან ისტორიაში არასდროს გავარდნილა და შეიძლება ითქვას, რომ ლისაბონელებს ტრინკაუს გამოსყიდვის ვალდებულება აქვთ.

მას შემდეგ, რაც "ბარსა" ტრინკაუს ტრანსფერიდან 10 მილიონ ევროს მიიღებს, კატალონიელებს მისი უკან დაბრუნების უფლება ექნებათ. ამისთვის "ბლაუგრანას" 20-დან 25 მილიონამდე გადახდა მოუწევთ, იმის მიხედვით, თუ რომელ წელს მოისურვებენ ფრანსიშკუს შეძენას. გარდა ამისა, ფეხბურთელის სხვა რომელიმე კლუბში გადასვლის შემთხვევაში "ბარსა" მისი სატრანსფერო ფასის 50%-ს მიიღებს.