ლევანდოვსკის კონტრაქტი 9-ნომრიანი მაისურის მორგებას ითვალისწინებს

"ბარსელონამ" რობერტ ლევანდოვსკი უკვე წარადგინა, მაგრამ ჯერ არ ვიცით, პოლონელი რა ნომერს მოირგებს და ის საქმეში არც ამხანაგურ მატჩში გვინახავს.

Sport-ის ინფორმაციით, "ბარსას" სურს, კლუბის ვარსკვლავურმა ახალწვეულმა 9 ნომერი ატაროს, რაც მარკეტინგული გათვლაც იქნება. კატალონიელები მისი ფორმების გაყიდვით დაახლოებით €20 მილიონის გამომუშავებას ვარაუდობენ.

ამავე წყაროს ცნობით, ეს მხოლოდ "ბარსელონას" სურვილი არაა - ლევანდოვსკის კონტრაქტში არის პუნქტი, რომელიც სწორედ 9-ნომრიანი მაისურის მორგებას ითვალისწინებს.

ამჟამად, ხსენებული ნომერი მემფის დეპაის ეკუთვნის, რომელმაც, შესაძლოა, "ლურჯ-ბროწეულისფერთა" რიგები ამ ზაფხულში დატოვოს. თუ ასე არ მოხდა, კლუბს მოუწევს, ის 9-იანის დათმობაზე დაითანხმოს.

დიდი ალბათობით, ლევანდოვსკის დებიუტი 24 ივლისს, "რეალის" წინააღმდეგ შედგება და საინტერესოა, ამ მატჩში ის მოედანზე რა ნომრით გავა.