ტერ შტეგენმა საუდის არაბეთიდან სერიოზული შეთავაზება მიიღო

აშრაფ ბენ აიადის ინფორმაციით, მარკ-ანდრე ტერ შტეგენმა საუდის არაბეთიდან ძალიან მიმზიდველი შეთავაზება მიიღო. დაინტერესებული კლუბი და სატრანსფერო თანხა, ჯერჯერობით, არ სახელდება. 

გასულ ზაფხულში გერმანელმა "ბარსასთან" კონტრაქტი 2028 წლამდე გაახანგრძლივა, რაც ნიშნავს, რომ მისი გაყიდვის შემთხვევაში, კატალონიური გრანდი საკმაოდ დიდ ფულს მიიღებს.

ტერ შტეგენი "ბარსელონაში" მე-10 სეზონს ატარებს და აქ მსოფლიოს ერთ-ერთ საუკეთესო მეკარედ იქცა, მაგრამ უკვე 30 წელს გადაცდა და შესაძლოა, კარიერის ბოლო ეტაპზე და მაღალ ხელფასზეც იფიქროს, რომელსაც საუდის არაბეთიდან შესთავაზებენ.

საბოლოო სიტყვა, რა თქმა უნდა, "ბარსას" ეკუთვნის. თუ ტერ შტეგენი წავა, კლუბმა მისი შემცვლელი უნდა იყიდოს, რადგან ინიაკი პენიამ გერმანელის 3-თვიანი ტრავმის დროს თავი კარგად ვერ წარმოაჩინა და გუნდში მასზე იმედებს არ ამყარებენ. 

მარკმა მიმდინარე სეზონში 20 მატჩი ჩაატარა და ამდენივე გოლი გაუშვა. მან კარი მშრალად 8-ჯერ შეინახა.