ჩავი ერნანდესი: დარჩენა მსურდა, მაგრამ მითხრეს, რომ უნდა წავიდე

დარჩენა მინდოდა, მაგრამ მითხრეს, რომ უნდა წავიდე. კლუბს საუკეთესოს ვუსურვებ. 

მიუხედავად იმისა, რომ ტიტულები ვერ მოვიგეთ, ჩემი აზრით, ამ სეზონში კარგად ვიმუშავეთ. ვფიქრობ, ამ ორწელიწადნახევრის განმავლობაში ყველაფერი სწორად გაკეთდა და სწორ გზაზე ვდგავართ, მაგრამ გადაწყვეტილებას ხელმძღვანელობა იღებს და მათ პატივი უნდა ვცეთ, რადგან კლუბი ყველაზე მაღლა დგას. გუშინ მოწყენილი ვიყავი და დღეს კიდევ უფრო დამწუხრებული ვარ.

რატომ არ გამოიწვია თვეების წინ დეკუს მიერ გაკეთებულმა განცხადებებმა ისეთი პრობლემები, როგორიც ჩემმა? ჩანს, რომ პირველივე დღიდან, ჩემმა სიტყვებმა მიწისძვრა მოახდინა. ნამდვილად არ ვიცი, რატომ.

მშვიდად მუშაობის საშუალება არ მომეცა. ერთი თვის წინ სტაბილურობა ვითხოვეთ. დარჩენა გვსურდა. ვფიქრობდით, რომ საქმე დასრულებული არ იყო, მაგრამ ამის შესაძლებლობა არ მოგვეცა. სამწუხაროა... ფეხბურთი და ცხოვრება ასეთია. 

ვეცადეთ, ემოციები გაგვეკონტროლებინა, მაგრამ ეს რთულია. ამ მატჩისთვის ისევე მოვემზადეთ, როგორც პირველისთვის.

ვგრძნობ, რომ ფანებს ვუყვარვარ და ეს სიამაყით მავსებს. ვფიქრობ, ისინი ჩვენს მუშაობას აფასებენ და დროის გასვლასთან ერთად, ეს კიდევ უფრო დაფასდება.

როცა გუნდი ჩავიბარე, მე-9 ადგილზე ვიყავით, მაგრამ სეზონი მე-2 პოზიციაზე დავასრულეთ, შემდეგ სეზონში კი ჩემპიონები გავხდით. ვფიქრობ, რთულ მდგომარეობაში ჩვენი მუშაობა არ დაფასდა. ჩემი მუშაობით ამაყი ვარ. ცხოვრების კლუბის გაწვრთნა დიდი პატივი იყო. გვინდოდა, სწორედ ასე, მოგებით წავსულიყავით.

ბარსას ძალიან კარგი თაობა ჰყავს. მათ პირველივე დღიდან ვენდეთ. ფეხბურთელებთან საოცარი ურთიერთობა გვქონდა - ეს ჩვენი მემკვიდრეობა იქნება.

ამ სეზონში ბევრი მატჩში ჩვენს ხელში იყო, მაგრამ ჩვენივე შეცდომების გამო წავაგეთ. ტიტულები იმიტომ ვერ მოვიგეთ, რომ 4-5 მატჩში კარგად ვერ ვითამაშეთ. სეზონის ძირითადი ნაწილი სოლიდურად ჩავატარეთ, მაგრამ იღბალმაც გვიმტყუნა.

უკან ვიყურები და ვხედავ, რომ ბევრი რამ გადავიტანეთ, მაგრამ ასევე ვისიამოვნეთ. ეს ყველაფერი ემოციური იყო. წაგებისა და მოგების გარდა, ფეხბურთში ფასეულობებიც არსებობს: განათლება და თანაგრძნობა. 

დარწმუნებული ვიყავი, რომ მომდევნო სეზონში უკეთ ვითამაშებდით. 

მინდა, ფეხბურთელებს დიდებული ძალისხმევის გამო მადლობა გადავუხადო. ისინი კარგად ვარჯიშობდნენ.

ქომაგებმა უნდა გაიგონ, რომ ეკონომიკური მდგომარეობა რთულია. 

ჩემი გაშვების მიზეზს მნიშვნელობა არ აქვს. მნიშვნელოვანი მხოლოდ კლუბია.

ერთ დღესაც ცხოვრების კლუბში დაბრუნება დიდი პატივი იქნება. ვნახოთ, ეს მოხდება თუ არა.

ახალ მწვრთნელს ვეტყოდი, რომ რთული სიტუაცია დახვდება. ბარსაში ყოფნა უკვე რთულია, რასაც არსებული ვითარება კიდევ უფრო ამძიმებს. მას გულმოდგინედ მუშაობა მოუწევს, რადგან აქ მარტივი არაფერია. ბარსელონაში მხოლოდ მოგებები გიხსნის. არ აქვს მნიშვნელობა, ნაცნობი ხარ თუ უცხო. თუმცა, ვფიქრობ, ფოკუსი და მოლოდინები ჩემზე უფრო დიდი იყო, რადგან ბარსას ისტორიის საუკეთესო თაობის წევრი ვარ. საკუთარი თავის წინააღმდეგ ვითამაშე. 

ფერმინი? რამდენიმე თვის წინ მას არავინ იცნობდა, ახლა კი ის ტოპ ფეხბურთელია. ვიმედოვნებ, ლოპესი აქ დიდხანს დარჩება. ის დიდებული მოთამაშე და ასეთივე ადამიანია. ფერმინი ევროპის ჩემპიონატზე წასვლას იმსახურებს. 

თქვენთან (მედია) გამკლავება? ეს აღზრდისა და ღირებულებების დამსახურებაა, რაც მშობლებმა მასწავლეს. ვიცი, რომ თქვენს საქმეს აკეთებთ. მადლობა თქვენც.