ჰანსი ფლიკის კომენტარი ატლეტიკოსთან თამაშის შემდეგ
გუშინ "ბარსელონამ" ძალიან კარგი მატჩი ჩაატარა და ესპანეთს თასის 1/2-ფინალის განმეორებით შეხვედრაში "ატლეტიკო" 3-0 დაამარცხა, თუმცა პირველ დაპირისპირებაში 0-4 წაგების გამო ჰანსი ფლიკის გუნდი ფინალს მიღმა დარჩა.
"ბლაუგრანას" დამრიგებელმა თამაშის შემდეგ კომენტარი გააკეთა:
ძალიან კარგი თამაში ჩავატარეთ. თუმცა ტურნირიდან გამოვარდნასაც უნდა შევეგუოთ.
ამ თამაშიდან კუბარსი და ბერნალი უნდა გამოვყოთ. ისინი ძალიან კარგები იყვნენ. მინდა, განსაკუთრებით აღვნიშნო კუბარსის მონდომება. ის დაუჯერებელი ტალანტია, მსოფლიოში ერთ-ერთი საუკეთესო ცენტრალური მცველი. ის ბურთით შესანიშნავი იყო. მისი თამაშის ყურებით ვისიამოვნე.
პედრი მოედანზე გვჭირდებოდა. მიხარია, რომ მას ტრავმა არ მიუღია, რადგან მისი მოედანზე 90 წუთით დატოვება რისკის შემცველი იყო.
ჩემპიონთა ლიგაზე წინ რთული გზა გველის. "ნიუკასლი" ძლიერი მეტოქეა. ახლა კი "ბილბაოსთან" ლა ლიგაში გასამართ მატჩზე ვართ კონცენტრირებულნი. თუ გვინდა, რომ ჩემპიონთა ლიგაზე კიდევ ბევრი თამაში ჩავატაროთ, მოედანზე ისეთები უნდა ვიყოთ, როგორც დღეს ვიყავით. ჩემი გუნდით ძალიან ვამაყობ.
ყველა ფეხბურთელი დაღლილია, რადგან მათ ყველაფერი მოედანზე დატოვეს, 100%-ზე მეტი. ვფიქრობ, ამ თამაშით გულშემატკივრებიც ბედნიერები არიან იმის მიუხედავად, რომ საბოლოო შედეგით ისინი იმედგაცრუებულები იქნებიან და ეს ნორმალურია. ფეხბურთელებმა აბსოლუტურად ყველაფერი გაიღეს, ეს ფანტასტიკური იყო.
შესაძლოა, ეს ჩვენი გუნდის თამაშის მაქსიმუმი იყო, თუმცა ყველა მატჩში ასეთები უნდა ვიყოთ. მაქსიმალურად ფოკუსირებულები უნდა ვიყოთ და მომდევნო კვირებშიც ასე განვაგრძოთ.
ამ სიახლეზე კომენტარები გათიშულია.
კომენტარები [ 9 ]