ნეიმარი და ალბა "კლასიკოსთვის" მზად არიან

"ბარსელონას" ორი ფეხბურთელი, რომელმაც სანაკრებო პაუზის დროს მცირე დაზიანება მიიღო, ორ აპრილს, მადრიდის "რეალის" წინააღმდეგ მოედანზე გასვლას შეძლებს.

მოგეხსენებათ, ჟორდი ალბას რუმინეთის ეროვნული ნაკრების წინააღმდეგ გამართული ამხანაგური შეხვედრის შემდეგ ტერფის ტრავმა აწუხებდა, თუმცა, მიუხედავად ამისა, "ელ კლასიკოში" მონაწილეობას მაინც მოახერხებს.

რაც შეეხება ნეიმარს, ის იმაზე უფრო ადრე დაბრუნდა, ვიდრე მოსალოდნელი იყო. კუნთის არეში მცირე დისკომფორტის გამო, მას პარაგვაის ნაკრებთან გამართული მატჩის გამოტოვებამ მოუწია.

"ბარსელონას" დღევანდელი ვარჯიში იოჰან კრუიფის ხსოვნისადმი პატივის მიგებით დაიწყო. აგრეთვე, გავრცელდა კლუბის ოფიციალური განცხადება, სადაც წერია, რომ ალბამ და ნეიმარმა დღეს გუნდთან ერთად ივარჯიშეს და შაბათისთვის მზად იქნებიან.