ერნესტო ვალვერდე "ესპანიოლთან" მატჩის წინ
"ბარსელონას" მთავარმა მწვრთნელმა, ერნესტო ვალვერდემ "ესპანიოლთან" მატჩის წინ პრეს-კონფერენცია გამართა.
"წინა თამაშის შედეგის გათვალისწინებით, უპირატესობა ჩვენს მეტოქეს აქვს, მაგრამ ასეთ სიტუაციებში აქამდეც ვყოფილვართ, თანაც ახლა მოსამზადებლად საკმაოდ დიდი დრო გვქონდა.
საშინაო მოედანზე ვთამაშობთ და დარწმუნებული ვარ, გულშემატკივრებიც აქტიურად დაგვიჭერენ მხარს. ძალიან მნიშვნელოვანი მატჩი იქნება და ყველანაირად ვეცდებით, შემდეგი ეტაპის საგზური მოვიპოვოთ.
დერბებს ყოველთვის განსაკუთრებულ მნიშვნელობას ვანიჭებ. ხანდახან, როცა სატურნირო ცხრილში გუნდებს შორის დიდი სხვაობაა, შეხვედრას თითქოს იგივე დატვირთვა აღარ აქვს, მაგრამ ორმატჩიანი დაპირისპირებები განსხვავებულია. პირველი თამაში წავაგეთ, რაც ჩვენთვის დამატებითი მოტივაციაა, მაგრამ ასევეა "ესპანიოლისთვისაც", რომელსაც იმ შეხვედრაში დაფიქსირებულმა ანგარიშმა ნახევარფინალში გასვლის იმედი ჩაუსახა.
ვფიქრობ, "ესპანიოლი" ისევ ისე, ორგანიზებულად ითამაშებს და თავის შანსს დაელოდება. შეტევაზე ისინი უარს ვერ იტყვიან, რადგან სტუმრად გატანილი გოლი უფრო ძვირად ფასობს. რთული თამაში იქნება, მაგრამ არა მხოლოდ ჩვენთვის. კატალონიური დერბის მიმდინარეობისას ჰაერში ყოველთვის დაძაბულობა იგრძნობა". - განაცხადა ვალვერდემ.
ამ სიახლეზე კომენტარები გათიშულია.
კომენტარები [ 7 ]