დადასტურდა: ნეიმარს ბარსელონაში დაბრუნება სურს - პირველი კონტაქტი უკვე შედგა

ცნობილი კატალონიელი ჟურნალისტი, ელენა კონდისი ადასტურებს, რომ ნეიმარს ბარსელონაში დაბრუნება სურს.

ბრაზილიელი ვარსკვლავი მზადაა, დაბალი ხელფასი მიიღოს, რადგან მისი მთავარი მიზანი ბარსაში თამაში და 2026 წლის მსოფლიო ჩემპიონატისთვის მომზადებაა.

ბარსელონაში ამ ვარიანტს განიხილავენ. ნეიმარის წარმომადგენლებთან პირველი კონტაქტი უკვე შედგა, თუმცა საბოლოო გადაწყვეტილება ჯერ მიღებული არაა.

ბარსელონას პრეზიდენტ ჟოან ლაპორტასა და ნეიმარის აგენტ პინი ზაჰავის ძალიან ახლო ურთიერთობა აქვთ, რაც ტრანსფერს ხელს უწყობს. ნეიმარს ბარსაში ზღაპრული დაბრუნება სურს - თანაც, ის 2025 წლის 30 ივნისს თავისუფალი აგენტი გახდება.

ბრაზილიელი ვარსკვლავი მშობლიურ სანტოსში 1 თვის წინ დაბრუნდა და მოედანზე უკვე იმაზე მეტი დრო აქვს გატარებული, ვიდრე ალ ჰილალში 1 წელიწადზე მეტი ხნის განმავლობაში. ნეიმ ალ ჰილალში სულ 7 მატჩი ჩაატარა (ჯამში 428 წუთი), 1 გოლი გაიტანა და 3 საგოლე გადაცემა გააკეთა, სანტოსში კი მან უკვე 6 მატჩში მიიღო მონაწილეობა (ჯამში 432 წუთი), 2 გოლი გაიტანა (მათ შორის, ერთ-ერთი კუთხურიდან) და 3 ასისტი მიითვალა. შესაბამისად, ჩანს, რომ ნეიმარი მოტივირებულია და მაღალ დონეზე თამაში ისევ უნდა.