"ბარსელონას", გულშემატკივართა სიმღერის გამო, სანქციები ემუქრება

ესპანეთის ჩემპიონატში ძალადობის ფაქტების აღკვეთის კომიტეტი "ბარსელონასა" და "ლევანტეს" შორის გამართული მატჩის დროს კატალონიური გუნდის გულშემატკივართა ქცევას იკვლევს.

23-ე ტურში მოგებული თამაშის (5:0) დროს, "კამპ ნოუზე" შეკრებილი გულშემატკივრები შემდეგ ტექსტსს სკანდირებდნენ: "ის მთვრალია, კრიშტიანუ მთვრალია."

"ბარსელონას" გულშემატკივრები ასე გამოეხმაურნენ რონალდუს მიერ "ატლეტიკოსთან" 0:4 განადგურების შემდეგ წვეულების გამართვას. საინტერესოა, რომ ესპანეთის ფეხბურთის ფედერაციაში ფრაზა "კრიშტიანუ მთვრალია" შეურაცხმყოფელად მიიჩნიეს, რის გამოც "ბარსელონას" სანქციები ემუქრება.